Герман улсад дээд боловсролыг Англи хэл дээр эзэмших боломж

Герман улсад Англи хэл дээр сурч болох уу гэдэг асуулт тус улсад суралцахыг хүсэгчдийн дунд түгээмэл байдаг билээ.

Тэгвэл Герман улсад Англи хэл дээр сурах боломжтой юу? Боломжтой. Гадаад оюутнууд Герман улсыг сонгон суралцдаг бас нэг чухал шалтгаан нь Англи хэл дээр суралцах  хөтөлбөрүүд бөгөөд ийм сургалтын тоо жилээс жилд өсөн нэмэгдэж байна.

Чухал санамж: Гэхдээ Англи хэл дээр суралцахыг хүсэгчид нэг зүйлийг маш сайн ойлгох ёстой. Хэрэв та бакалаврын хөтөлбөрт элсэн суралцахаар зорьж байгаа бол дийлэнх их, дээд сургуулийн хөтөлбөр нь Герман хэл дээр явагддаг гэдгийг мэдэх хэрэгтэй. Тиймээс бакалаврын зэргийн сургалтанд хамрагдах хүсэлтэй бол цаг хугацаа хэмнэхийн тулд хувийн сургуулиас сонголтоо хийсэн нь дээр юм.

Харин Герман улсад магистр, докторын түвшинд зэрэг горилохыг хүсэгчдийн хувьд Англи хэл дээр сурах боломж нь илүү түгээмэл байдаг. Ерөнхийдөө Англи хэл дээр үзэж болох хөтөлбөрийн дийлэнх хэсгийг Инженер, Байгалийн Шинжлэх ухаан, Эдийн засагтай холбоотой мэргэжлүүд эзэлдэг.

Та дараах чиглэлээр Англи хэл дээр суралцах боломжтой.Үүнд:

• Математик, байгалийн ухаан
• Эдийн засаг
• Инженер
• Хууль
• Нийгмийн шинжлэх ухаан

Англи хэл дээр суралцах боломж багатай чиглэлүүдээс дурьдвал:

• Хэл соёл судлал
• Анагаах ухаан
• Мал эмнэлгийн анагаах ухаан
• Урлаг, урлагийн онол
• Спорт

Герман улсад Англи хэл дээр суралцах боломжтой сургалтыг яаж олох вэ?

Сургууль болон сургалттай холбоотой бүх мэдээлэл нь цахим хуудас, вэбсайтад тавигдсан байдаг учраас олоход хялбар байдаг. Гэхдээ зарим нэг эргэлзээтэй зүйлийн учрыг олоход, дэлгэрүүлэн судлахад хугацаа их шаардагдах тохиолдол бий.  

Хэрэв та аль их сургуульд суралцахаа шийдсэн бол тухайн сургуулийнхаа вэбсайт-аар зочилж  англи хэл дээр суралцах хөтөлбөр байгаа эсэхийг шалгаад үзэх хэрэгтэй.

Нөгөөтэйгүүр та аль сургуульд сурахаа хараахан шийдээгүй байгаа бол Англи хэл дээр суралцах боломжтой дараах сургуулиудыг судлаад үзээрэй.  Үүнд:

• Hochschule Mannheim –University of Applied Sciences
• Karlsruhe Institute of Technology
• Berlin International University of Applied Sciences
• Bremen University of Applied Sciences
• Jacobs University
• Technische Universitat Munchen
• University of Gottingen
• Max Planck Institute
• Freie Universitat Berlin
• Technische Universitat Dresden
• Munich University of Applied Sciences
• University of Bonn
• Saarland University
• Frankfurt School of Finance & Management
• Technische Universitat Kaiserslautern
• Universitat Hamburg
• ULM University
• HHL Leipzig Graduate School of Management
• University of Bayreuth
• WHU-Otto Beisheim School of Management
• University of Stuttgart
• RWTH Aachen University
• HTW Berlin
• Technische Universitat Berlin
• TU Darmstadt
• University of Hohenheim
• University of Erfurt
• University of Freiburg

Нэмж хэлэхэд та илүү олон боломжыг олохын тулд нийтлэлийн сүүлд дурьдаж буй эх сурвалж болгон ашигласан вэбсайтуудаар зочлон өөрийн сурах хөтөлбөр, суралцах түвшин зэргээ сонгон нарийвчилсан хайлт хийж англи хэл дээр суралцах боломжтой хөтөлбөрүүдийн жагсаалтыг харах боломжтой.

Англи хэл дээр сурах боломжтой, сургалтын төлбөргүй их сургуулиуд

Англи хэл дээр суралцах боломжтой Германы төлбөргүй их сургуулиудаас:

• Technical University of München
• University of Bonn
• University of Hamburg
• TU Darmstadt
• FAU Erlangen Nurnberg
• University of Munster
• Hamburg University of Technology
• SRH University of Heidelberg
• University of Applied Sciences Wurzburg Schweinfurt
• Leibniz Universitat Hannover

Эдгээр их сургуульд элсэн орохын тулд зарим төлбөрийг (“семестрийн хураамж” гэж нэрлэдэг) төлөх шаардлагатай байдгийг анхаарна уу. Үүнд ихэвчлэн оюутны холбоонд элсэх төлбөр, нийтийн тээврээр зорчих тасалбар, бүртгэлийн хураамж ордог. Гарах нийт зардал нь таны сонгосон сургуулиас хамаарч € 150-300 € хооронд хэлбэлздэг.

Үүнээс гадна дээр дурьдсан их сургуулиудийн дийлэнх хөтөлбөрүүд нь үнэ төлбөргүй хэдий ч зарим нэг магистрын хөтөлбөр нь бага зэргийн төлбөртэй байдгийг анхаарна уу.

Элсэлтийн ерөнхий шаардлага

Элсэлтийн шаардлагын хувьд Герман хэл дээр заагддаг сургалттай адилхан боловч нэг гол ялгаа нь англи хэлний албан ёсны шалгалт болох TOEFL эсвэл IELTS – ын шаардаж буй оноог харуулах ёстой байдаг.

Англи хэл дээр суралцахын тулд дараах ерөнхий бичиг баримтуудыг бүрдүүлэх хэрэгтэй.

• Хүлээн зөвшөөрөгдсөн боловсролын бичиг баримт
• Өмнө нь төгссөн сургуулийн дүнгийн баталгаажуулсан хуулбар
• Англи хэлний мэдлэгээ нотлох сертификат
• GRE эсвэл GMAT шалгалтын оноо / эдийн засаг, бизнесийн чиглэлээр сурах тохиолдолд/
• Суралцах зорилго тодорхойлсон захиа эсвэл таныг тодорхойлох захидал

Таны өмнө нь эзэмшсэн боловсролын зэрэг Германы дээд боловсролын стандартад нийцсэн байх ёстой ба эс бөгөөс их сургуульд элсэн орох боломжгүй юм. Ийм тохиолдолд таны сонгосон сургууль шаардлагатай ур чадвар, мэдлэгийг олгох үүднээс бэлтгэл сургалтад хамрагдахыг шаардах  магадлалтай.

Германы их сургуулиуд англи хэлний мэдлэгийг нотлоход хэд хэдэн төрлийн шалгалтын оноог хүлээн зөвшөөрдөг ба ихэнх нь TOEFL болон IELTS-ын оноог хүлээн зөвшөөрдөг.

Таны сонгосон сургууль, сургалтын хөтөлбөрөөс хамаараад англи хэлний шалгуурт  тавигдах оноо нь өөр байж болох хэдий ч ихэвчлэн TOEFL 80, IELTS 6.5 онооноос дээш байхыг шаарддаг.

Иймээс амжилттай элсэн орохын тулд болж өгвөл хэлний оноо өндөр авах шаардлагатай. Ялангуяа эрэлт ихтэй сургуулийн хувьд өрсөлдөөн ширүүн явагддаг учраас элсэлтийн комисс хэд хэдэн гүйцэтгэлийн элементийг харгалзан үздэг. Өөрөөр хэлбэл англи хэлний өндөр мэдлэг, өмнөх боловсролын сурлагын дүнгийн сайн үзүүлэлт зэрэг нь таныг сонгоход нөлөөлдөг гэсэн үг.  

Эх сурвалж:

https://www.studying-in-germany.org/

https://www2.daad.de/